自從新界村屋颳起僭建風暴後，身兼行政會議成員嘅鄉議局主席劉皇發，一直被部分鄉紳批評態度過分軟弱，唔能夠維護新界人權益。喺上千鄉民包圍立法會前夕，發叔嘅態度尋日突然一百八十度大轉變，先後喺兩個場合發狠話，警告政府唔好亂咁嚟，否則肯定會造成災難性嘅局面。發叔今次講得咁盡，但唔知係唔係可以堅持到尾呢？
