政情：鄭志剛獲選福布斯時尚華人
《福布斯》（Forbes）中文版新鮮出爐嘅「全球時尚界25華人」排行榜，有好多香港人熟悉嘅臉孔，包括新世界集團第三代接班人鄭志剛（Adrian）、I.T服飾董事長沈嘉偉、百麗國際首席執行官盛百椒、甫躋身上市公司行列嘅米蘭站主席姚君達亦榜上有名，認真可喜可賀。
被錯指係彤叔之子
今次排行榜唔單止要識得穿衣打扮咁簡單，而係着重於時尚界嘅領導人物。今次排行並無具體分數標準去評選，全憑同全球時尚領域專業人士交流心得總結而成。上榜人士遍布中港台，涉及行業有百貨、零售、珠寶、鞋業等。
Adrian率領嘅周大福珠寶，去年推出嘅中國古典設計系列揚威巴黎，一步步朝着高檔市場邁進，又籌備緊上市，當然係時尚界不可忽視嘅人物啦。不過，《福布斯》忙中有亂，竟然話Adrian係鄭裕彤之子，其實彤叔係Adrian爺爺，鄭家純先至係Adrian嘅父親。