政情：長者攔途送柿 諷張建宗無口齒

張建宗以為唔去立法會聽證會就可以避談全民退休保障，點知去到社工分享會時，全民退休保障聯席及職工盟等多名成員已經在場守候，面對面攔路狙擊。職工盟成員舉起「全民退保一拖再拖，長者無咁長命等」標語寸爆張建宗一味拖，亦有長者送上一個柿子同兩幅漫畫，批評佢冇口齒，冇真正諗方法去幫啲老人家，又諷刺佢好似隻牛咁，做嘢又慢又硬頸。

一味三幅被 唔正視問題

有長者批評，張建宗做嘢真係好勤力，但係對於全民退休保障就真係冇晒符，淨係好硬頸咁重複又重複「三條支柱」理論，話政府現時所做嘅措施已經好好，只要諗吓點樣改良就可以搞得掂喎，根本唔肯正視老人家嘅貧窮問題。對於張建宗缺席立法會聽證會，有社工就批評話，聽證會假假哋都算係收集民意嘅平台，有乜理由可以唔去聽吓團體講乜呢！

班長者的確無講錯，張建宗尋日回應記者問題時依然係老調重彈，強調全民退休保障涉及三方供款，存在好大問題，所以短期內社會好難達到共識，建議優化現行強積金最務實喎；佢又話，當局已計劃喺十一月增加居家長者嘅社區生活津貼，總之將一堆舊嘢塞住班長者把口。

對於被指有心缺席聽證會嘅指控，張建宗就重複話個社工活動一早安排咗，佢都冇辦法喎。如果有心去聽證會聽意見，都可以去一陣以示尊重，甚至要求改期同社工會面，相信班社工都會體諒，況且好多社工都支持推行全民退休保障，所以張建宗點解釋都講唔過去囉！