中環出更：黃家和搞「萬人食拉麵」谷起日式食肆
日本核輻射食品陰霾漸散，日本菜開始有轉機，唔少日本食肆為求生存，都減少賣魚生，轉型推介烏冬、拉麵，開到成行成市。「日式達潮祭：至安心」召集人黃家和（Simon）早前搞完「至安心」振興本港日式食肆後，反應熱烈，佢於是食住個勢頭，再喺十月底發起「萬人食拉麵」大型活動。
萬人齊起筷，搵場地、爐頭，絕對難唔到香港餐飲聯業協會會長Simon，事關佢過去先後喺舊啟德機場同金鐘添馬艦空地籌辦萬人盆菜宴等大型活動，每次都搞得有聲有色。不過，最頭痕係要邀請逾百位拉麵師傅坐鎮開爐煮麵，所以Simon近期穿梭全港大小食肆，發掘隱世「拉麵廚神」。
講開食麵，原來Simon係個「麵癡」，每餐無麵不歡，至愛日式拉麵及中國傳統蝦子麵，所以近期就算為咗發掘「拉麵廚神」而要頻頻四出食麵，相信都唔會食麵食到厭嘅。
美食博覽 日展商倍增
日本核輻射事故爆發以來，已令日式食肆「吊鹽水」三個多月，至今部分食肆嘅生意額已反彈至地震災難前。Simon話，日本商人轉數快，出招向香港推介非核輻射污染區嘅農產品，包括熊本士多啤梨、沖繩蘋果、九州番茄等，而報名參加八月「香港美食博覽」嘅日本參展商，都有逾一百五十個，比去年多一倍。果然有危自有機！
卓妮