夕陽政府施政好似魔法幻影，可惜手法拙劣，皆因政策從不貼近民情，傲慢治港，剛愎自用，是以落得學者所說的「三自五失」：三自指煲呔曾政府自廢武功、自取其辱、自毀長城；五失是失判、失序、失位、失職、失德。咁嘅政府，試問同風乾臘鴨有乜分別？
依老朽話，「三自五失」的病源在於煲呔曾政府從來不為人們謀幸福，如今臨近收檔，任何政策肯定藥石無靈，施政管治病入膏肓，只因「只有自己，目無市民」。
北大人說，「房事」不濟就會變成政治問題，煲呔曾才「覺今是而昨非」，一時放風話復建居屋，一時又話助中產置業，政府有責任協助解決問題。老朽好似聽緊隻食齋嘅老虎喺度講心經。煲呔曾吹水治港六年，佢為港人做過乜？黃金十年？金融業可養一千萬人？政治化妝術再精明也只是神話，唔通將煲呔變頭巾，包紮好個頭，手執阿拉丁神燈，口中唸句「媽呢媽呢home」，居屋就一幢幢在眼前，從此便沒有劏房危樓？
老朽一把年紀，自然不會再傻再天真。政客最叻吹水，最叻製造神話——不過啲神話通常有害，你信必累你輸身家。甚麼「物價狂升只是暫時的」、「刺激政策終將有效」、「政府有決心有能力」……夕陽政府一手在收拾行李準備豪裝逍遙，一手在變魔術，剩下市民口中唸唸有詞：敢問屋在何方？
看官，人間正道是滄桑，想住居屋？想政府助中產置業？海上仙山虛無縹緲，人間居屋怕只在廟上供着，別當回事！