政情：鄭海泉信唔過立會？
全港十多萬公務員今年獲加薪百分之六至七，負責畀錢嘅納稅人唔少都覺得肉赤，原來立法會班議員仲狼胎，要求大幅加三成，不過就唔係講議員人工，而係議員嘅實報實銷辦事處津貼，等佢哋可以開多幾個議辦同加啲助理人工。其實立法會秘書處早前已就議員嘅開支狀況進行統計，不過負責審議議員加薪加津貼嘅獨立委員會，仍然決定要親身落啲議員辦事處度實地視察。咁又好難怪佢哋嘅，早前先有多名議員被揭亂花津貼狂印利是封、毛巾、紙扇同環保袋，委員會信唔過班議員都係好正常。
由鄭海泉做主席嘅獨立委員會尋日開會，請埋立法會議員酬金及工作開支償還款額小組委員會主席劉慧卿出席。卿姐喺會上向鄭海泉詳述議員要求大加津貼嘅理據，仲要求喺今年十月、即本屆立法會最後一個立法年度就實行。不過鄭海泉都係話想實地睇完啲議辦運作後再決定，其中直選、功能界別、舊議員同立會新丁嘅辦事處都會去，但最後揀邊個就由立法會秘書處決定。