政情：鄉議局舊局址冇人吼
新界鄉議局密鑼緊鼓為沙田石門新局址開幕典禮做準備，但同一時間亦為九龍塘舊局址尋找買家。有鄉議局中人透露，局方早前以暗標方式，邀請有興趣人士競投舊局址，曾經有幾個人就此同該局接洽，但係睇完都覺得唔係好啱心水，最終都無人落標，搞到依家要改為正式公開招標出售。
大家咪以為「流標」好閒，事關鄉議局新局址尚餘幾千萬元工程費仲未埋尾，需要好大嘅現金流，搞到近期要四圍撲水，好彩最後有一名已退休嘅鄉議局資深議員出面同某銀行聯絡，獲銀行同意向該資深議員透支唔超過五千萬元畀鄉議局應急，但條件係收取年利息兩釐。
點解銀行會咁順攤借錢畀該名資深議員呢？其實以鄉議局主席劉皇發為首嘅三巨頭要作出擔保，當然該資深議員亦都要孭飛，用私人資產作為擔保。據悉，鄉議局初步決定喺短期內以公開招標方式再次出售舊局址，如果有人認頭就可以陸續還錢畀該資深議員，咁件事就可以圓滿解決喇。