政情：區議員搶閘登記攞錢
政府跪低向全民派發六千元之餘，連派錢都派得衰過人，硬係要啲長者親身走去先登記後攞錢。尋日我哋收到線報，話立法會尚未通過撥款畀政府派錢，但已有區議員搶先幫長者去登記，仲要長者提供埋回鄉證做登記添，搞到長者們大惑不解，更懷疑有人想攞長者啲個人資料作其他用途。
話說新民主同盟沙田區議員梁永雄日前喺辦事處外張貼告示，表明可以幫長者預先登記領取六千元嘅資料，以便正式開始登記時，就由佢代為轉交畀相關銀行或郵政局。告示仲特別提醒老人家要帶備身份證、銀行存摺去登記，同埋注意政府無託人做上門登記㗎，所以長者們要「加強警覺，謹（慎）防被騙」。
線報話告示一出，唔少長者就上去登記，有長者仲同爆料人講，梁永雄辦事處要求長者一併帶埋回鄉證去登記添。我哋嘗試過聯絡梁永雄，一直未有回覆。其實區議員協助長者並無不可，但立法會未批錢，而且登記細節都未清楚，加上私隱問題鬧得熱烘烘，搶先幫長者登記實在惹人非議囉！