政情：政府猛落藥 阻七‧一上街

三流把戲 粉飾太平

現時最令夕陽政府頭痛莫過於房屋問題，煲呔曾遭國務院港澳辦主任王光亞就市民住屋問題「點醒」一番後，就極速變臉，放風話會復建居屋，立場一百八十度轉變。呢啲叫做京官講一句，好過議員、市民講一千句。復建居屋刺激港人開心神經，可惜政府根本對整個土地安排欠缺長遠計劃，以圖透過放風過骨，縮骨吝嗇，莫過於此。

煲呔曾放完復建居屋嘅風，又輪到財爺鬍鬚曾上周宣布派錢六千元嘅安排細節，八月先登記，明年再攞錢，結果被市民批評派錢拖得太耐。到咗今個星期，距離七‧一進入倒數階段，由政務司司長唐英年負責嘅關愛基金尋日又公布埋向新移民派錢嘅安排，大幅度放寬領取六千元嘅資格，大家齊齊十一月攞錢。另外行政會議尋日又罕有否決東隧嘅加價申請。

政府民望直插谷底，問責官員孭鑊，往往要公務員受罪，谷谷吓條氣唔順，七‧一跟大隊上街都唔出奇。政府為咗避免掛萬漏一，早前行政會議快快通過公務員加薪，而且加薪幅度爆晒燈，跑贏晒通脹，如果話唔係為咗減低公務員嘅怨氣都冇人信啦！

政府為求為遊行降溫，復建居屋、派錢、抗通脹、公務員加薪等，鋪天蓋地好消息一次過推晒出來，企圖為七‧一遊行降溫。不過，市民有靈魂、有智慧，唔係單憑用錢就可以塞住把口嘅，相信最後隨時都係錢照攞，七‧一繼續上街鬧爆呢個夕陽政府，要求煲呔曾下台。