中環出更：哥頓太買手袋 唔怕無折扣
女人買手袋，唔會滿足於只係裝到嘢咁簡單，仲要用嚟襯衫，所以款式都好重要，相信呢一點好多名媛都會認同，難怪佢哋個衣櫃永遠都爭咁個啱心水嘅手袋，點解決？見到啱就買囉！卓妮早前喺馬場遇到幾位名媛同靚太，大家不約而同講起買手袋嘅心得，聽落各有各喜好。
莊偉茵愛越南品牌
國泰航空企業事務董事莊偉茵就鍾意啲特別款式，尤其係手作仔嘅手袋，好似有個由香港設計師Christina Yu設計嘅越南時裝品牌Ipa Nima，都係佢嘅「飛佛」，呢個波希米亞風格手袋，連國泰頭等艙都有提供畀乘客使用，但唔係偉茵引入，而係佢班同事投票決定嘅，因為佢唔想自己嘅喜好影響大家，但見大家嘅想法咁一致，佢都好驚喜喎！
合和實業主席哥頓胡應湘太太郭秀萍，衣着年輕有活力，尤其係配襯嘅手袋，每次都配搭得宜。胡太話，佢無特別偏好，最緊要係啱款同啱色，乜嘢牌子都無所謂。正因為佢對手袋無特別偏好，所以幾乎全部大牌子都無折扣，有次胡太忍唔住問店員點解自己唔係VIP，點知店員就叫胡太再買多啲，胡太即時耍手。不過，就算無折扣都無所謂，事關胡太多數都係趁外遊先至買手袋，貪外遊電話少啲，可以專心行街喎。
香港女童軍總監彭徐美雲都唔崇尚名牌，但都係手袋癡，每次行街發現有新獵物就會即時出手，雖然彭太自己用錢買花戴，但佢都幽默話唔可以畀老公知佢買手袋，事關佢真係有好多存貨喺屋企。事業型嘅彭太仲話，佢每日都要攞好多文件，依家仲要袋埋個iPad出街，所以見親大手袋都特別有好感喎。
卓妮