政情：IT豪喺廟街發迹
立法會資訊科技界議員譚偉豪（IT豪，圖）當年廿五歲就創業、未夠卅歲就做上市公司主席，其公司生產嘅「快譯通辭典機」更長賣長有，唔少人都想了解佢嘅成功之道。估唔到，原來IT豪當年係喺廟街發迹，而佢對科技嘅興趣更係源於鴨寮街！
IT豪日前出席論壇時憶述，佢哥哥喺佢高中時喺鴨寮街買咗第一部蘋果電腦返嚟，「啟蒙」咗佢對科技嘅探究，更激發佢發憤讀書，考入中大電子系。IT豪畢業後工作兩年即夥拍上司，喺廟街嘅一幢商業大廈創業。佢話廟街同佢好大淵源，但笑言喺廟街好難請到女秘書，故公司做咗幾年後就搬離咗呢個發迹地。
IT豪當年靠「快譯通」起家，產品推出後即大賣百萬部，勁賺逾億，無奈卻被他人抄橋，出產相類產品。但IT豪就好睇得開咁話，如果唔係有呢個競爭對手，相信「快譯通」唔會進步得咁快喎，呢份胸襟真係唔係人人有。