政情：李華明未出手浴缸已反肚
今年龍舟嘉年華搞咗個名人划浴缸比賽，參加者大有來頭，包括立法會議員、商界人士同埋藝員。立法會議員李華明一開始好風騷咁同岸邊睇比賽嘅市民揮手，好似好有信心咁，但可惜出師不利，比賽開始唔夠半分鐘，李華明個浴缸就反轉咗，同拍檔雙雙跌落水，要由隔籬嘅工作人員救番上嚟。佢上岸接受訪問嘅時候仲死頂話自己未試過喺維港游過水，所以今次嘅感覺都幾特別喎。不過佢都承認自己有少少唔開心，因為連划都未划過就反咗，感覺有啲唔抵。
陳淑莊攞尾三
另一位有份出賽嘅議員仲有陳淑莊（Tanya），雖然佢哋划吓划吓竟然划咗去人哋條賽道度，但最後都攞咗個尾三。Tanya就話因為佢同助手嘅磅數差唔多，平衡起上嚟都唔係好困難。佢又話一啲都唔介意自己排尾三，因為佢同助手嘅目標都只係唔好反艇。問Tanya之前有冇好好準備今次嘅比賽，佢就話同助手只係試過喺辦公室將兩張櫈放埋一齊，再用長遮划吓划吓就當練習咗喎。
