政情：黎棟國湊孫女不亦樂乎
父親節唔只做爸爸嘅開心，為人爺爺嘅同樣甜在心頭。保安局副局長黎棟國嘅細仔早於數年前已三年抱兩，奈何佢哋一家長居澳洲，黎Sir一直亦只能喺網上越洋同孫仔玩，以及用iPad睇孫仔嘅相「止渴」。不過，今年黎Sir居於香港嘅大仔終於為佢添多一個女孫，令佢可喺香港一嘗湊孫之樂！
黎Sir話，孫女喺五月六日嘅三時三十三分出世，有三三不盡嘅寓意，相當好意頭，佢仲大讚孫女眼仔睩睩，十分趣致。黎Sir笑言，自從孫女出世後，佢太太同佢玩得不亦樂乎，而佢每日放工之後都歸心似箭，搞到自己應接不暇喎。
孫仔拍片祝父親節快樂
雖然注意力被分散，但遠在澳洲嘅兩名孫仔亦相當識做，專誠拍咗條短片祝黎Sir父親節快樂，仲upload埋上YouTube，個個睇完片都大讚佢哋得意，無不羨慕黎Sir。難怪我哋尋日打畀黎Sir時，佢都難掩喜悅，甜絲絲咁話今年父親節特別開心啦。