政情：侯志強鬧港府唔識寶
上水河上鄉每年都會慶祝傳統節日洪聖爺誕，除咗筵開過千席外，仲會燒花炮助興。呢個咁特別嘅節日，除咗吸引本港市民參觀外，對外國遊客都非常吸引，但上水鄉委會主席侯志強就話政府唔識寶，一個仙都唔肯出去保留佢。
拒資助洪聖爺誕經費
侯志強話，好似河上鄉個洪聖爺誕，每年經費用幾百萬，但政府完全無幫吓手將咁特別嘅傳統保留，佢話：「呢類傳統活動真係要支持㗎，旅遊係無煙工業，搞得旺吸引到人嚟香港睇有咩唔好先？」
澳門前日舉行哪吒誕，主辦單位為隆重其事，諗到燒花炮助興，不過原來花炮喺澳門已經失傳三十年，負責人靈機一觸，記起之前嚟香港參加洪聖爺誕見過呢類花炮，即時聯絡侯志強幫手，侯志強二話不說，立即答應，一共帶咗七個花炮過去，仲帶多兩隊麒麟隊過去添，認真唔話得。侯志強前日為咗帶花炮同麒麟去澳門，連鄉議局一個好重要嘅會議，佢都不能分身出席。