政情：邱騰華追唔上民意步伐

邱騰華尋日接受訪問時話，政務官絕對係充滿挑戰嘅工作，事關每次上頭委派佢去新部門工作時，佢都要即時埋位做嘢，唔會有空餘時間畀佢熱身，慢慢等佢上手。加入政府超過三十年嘅佢仲話，最深刻係佢喺民政署工作之時，事關當時嘅地區工作令佢知道，即使政府工程嘅出發點係好，但都有可能未貼近民情，亦令佢頓悟到施政係要有中庸之道喎。

功績一項都諗唔到

雖然邱騰華聲稱自己有「頓悟」，但似乎呢啲經驗未有反映喺佢嘅工作上。眾所周知，邱騰華幾乎係掂乜衰乜，最經典就係上年五月港府計劃以「先訂立，後審議」嘅形式，喺缺乏民意基礎下計劃佔用郊野公園擴建將軍澳堆填區時，遭立法會反對兼廢令，將行政立法關係搞到僵至冰點，最後迫使港府放棄原先計劃，極為面懵；另外邱騰華亦喺全城圍剿下，決定就停車熄匙草案提出多項豁免，變相將新例「剝光豬」，更唔好講年前搞到佢一身蟻嘅慳電膽醜聞嘞。

邱騰華尋日喺電台節目上，仲死撐自己推出嘅政策惹爭議係「正常不過」嘅事，事關唔同人對環保嘅概念都唔同喎。被問及慳電膽醜聞時，佢仲話呢個係「過渡咗嘅問題」，又話事實會證明一切，「從政者必須有此胸襟」。其實若果邱騰華肯真係聽多啲市民嘅意見，真正從經驗中反省，而唔係得個講字，好多瘀事醜事根本唔會發生，佢都唔會咁「惹火」，上任四年咁耐，大家一項佢嘅功績都諗唔到，只記得佢嘅衰嘢。佢無論係做政務官定係問責局長，都係跟唔上，真係應該好好反省吓！