中環出更：陳晴出差 囝囝伴左右
陳晴（Judy）係全職媽媽，但佢其實身兼幾職，佢前幾日以香港海洋公園保育基金主席身份，同傳媒簡報保育工作，佢話今個年度收到一百零八份研究申請，基金將會撥近五百萬元資助四十一個亞洲保育項目，涉及十個國家、廿七種受威脅物種。除咗香港，佢哋亦有幫手，為四川、陝西、甘肅等地嘅熊貓種竹，有一次為該地一次過種咗十六萬棵。
香港獲獎 囝囝被讚好腳頭
Judy囝囝只得六個月大，但已經可以陪媽媽出差嘞。Judy另一個主席身份係聯合國兒童基金香港委員會主席，上個月佢生日撞正母親節，所以帶埋囝囝去瑞士開大會，咁啱嗰次係廿五年嚟香港首次獲獎，成為各地嘅籌款冠軍，於是個個都讚佢囝囝好腳頭。Judy又話，最近有個慈善機構無論名字、用色同標記都同佢哋好似，基金會已交咗畀律師處理，佢好贊成法改委建議對慈善團體進行監管，除以正視聽，亦可畀捐贈者信心。