中環出更：雞蛋仔勾起名人童年回憶
尋日馬場出現雞蛋仔蹤影，頓時勾起大家嘅童年回憶，小時候捱過苦嘅太子珠寶鐘錶主席鄧鉅明細個食包包食飽，到依家都鍾意食叉燒包，莎莎主席郭少明就鍾意食甜食，最愛酥皮蛋撻，恒生副董事長兼行政總裁梁高美懿就鍾意紅豆沙溝豆腐花，但係要偷食。
太子珠寶鐘錶尋日第二年喺沙田馬場舉行太子珠寶鐘錶賽馬日，身為主人家嘅鄧鉅明特別為嘉賓提供雞蛋仔小食，令成個JC Box都充滿甜香，亦勾起大家嘅童年回憶。
好多人都知鄧鉅明白手興家，佢成長嘅年代正值香港發展期，生活環境一般，每次上茶樓每人都只可以食兩碟點心，每次爸爸都一定叫叉燒包，因為夠飽肚，到咗依家，佢上茶樓都一定食呢種點心。
至於郭少明夫婦就最sweet，事關郭太羅桂珍一見雞蛋仔預備中，即刻排隊攞畀老公試。郭生卻特別鍾意酥皮蛋撻，不過最懷念嘅都係孖條，事關天時暑熱，同老友一人一半嘅青葱歲月真係一個美好回憶。
葛優現身沙圈極受歡迎
梁高美懿家教嚴，細個唔可以買街邊小食，所以難得補課同出席課外活動，唔使坐屋企車嘅時候，佢就會同同學去學校附近嘅糖水舖開餐，最愛紅豆沙溝豆腐花。
新婚嘅桌球神奇小子傅家俊都喺馬場，佢同新婚太太翹住手，一樣甜到不得了。食完甜品，卓妮落沙圈見到好多人圍住咗影帝葛優！卓妮並無眼花，葛影帝獲馬會北京會所邀請過嚟參觀，葛優第一次入馬場，唔少馬主都把握機會同佢合照，佢亦來者不拒，好友善。
卓妮