政情：黃英豪百萬投饒宗頤墨寶
骨與風濕關節病預計在未來會成為導致慢性殘障嘅主因，正確認識及適當治療風濕病尤其重要，難怪金至尊集團主席黃英豪（Kennedy）對香港風濕病基金會咁支持。早前基金會舉行慈善晚宴，Kennedy買枱之餘，仲以一百零八萬元投得國學大師饒宗頤教授嘅墨寶《厚德載物》，前日就舉行墨寶及支票頒贈儀式，饒老親手送上墨寶，相當難得。
Kennedy話，風濕病係一種長期慢性病，連骨都會變形，奈何藥物價格好貴，所以佢一直都好支持香港風濕病基金會，但就冇諗過有緣投到饒老嘅墨寶。Kennedy一直好鍾意《厚德載物》呢四個字，事關同佢爸爸「乾亨」名字一樣出自《易經》，加上饒老一字難求，仲要係近期新作添，咁難得，難怪佢由八萬八千元底價嗌到一百零八萬元都無聲沙喇！