世病百態，只講數字不講實效，是浮誇病；今一眾問責官，民望跌至谷底，竟也當仁不讓趁公務員加薪之際，伺機要求將人工恢復至○九年自願減薪嘅水平，即係加番百分之五點三八，是懷舊病。
講真，一眾庸官治港無方，施政無能，好應向日本首相菅直人學習唔要首相人工——直至搞掂核災難事件；唔減人工都掩住大半邊嘴偷笑喇，還斗膽話要加人工，確可怒！
眾所周知，一眾問責官員閒閒地都月薪十多二十萬，而局長即使係「人肉錄音機」，日薪一萬，月薪三十萬，年薪三、四百萬，絕對唔係清代詩人趙翼《窗雞》諷喻啲讀書人，敢說真話卻可悲：呼來矮屋西，可憐啄食只糠粞。有時竟日無人餵，猶奮飢腸盡力啼。
做人最緊要知足，如今民怨沸騰成咁，一如有議員指出，問責官員聲望在民望中創新低，依家要求加人工，只會令民憤火上加油，咁叫作陸雲庭睇相，唔衰攞嚟衰。彈得好！
其實，從另一個角度看，假如思想是種子，在有的土壤它能成長，在有的土壤它就死亡，所以播種思想的人，首先要研究土壤。家陣社會矛盾深化成咁，高官出席任何場合都會遇上示威或請願人士，每次蒲頭都要保鏢、警員、民安隊開路，否則連離開現場都有困難。
是故，喺咁嘅土壤環境，想追回○九年嗰雞碎咁多嘅扣薪，如此懷舊，絕對不會是一種「思古幽情」的享受，而是一種思想的腐化。
飽食終日，猶奮肥腸胡亂啼係一種罪過！