政情：議員自爆病歷撐脊醫
目前全港有百多名脊醫，為腰骨有問題嘅市民提供治療，但政府就唔肯將佢哋嘅專業地位同西醫或中醫看齊，拒絕承認由脊醫簽發嘅病假紙，令好多有腰背痛嘅打工仔，為免蝕咗啲病假而唔去睇脊醫，被迫改睇西醫或者中醫。立法會人力事務委員會尋日討論有關問題，多名議員不惜自爆病歷，力撐班脊醫。
尋日有兩個脊醫團體上咗委員會申訴，話西醫用藥物治療腰痛，效果遠不及脊醫，但西醫有權簽發病假紙而佢哋唔可以。不過，與會嘅政府官員就死撐，話市民對脊醫認識唔深，多個亞洲國家亦未承認脊醫病假紙，加上如果要修改勞工法例承認脊醫病假紙，涉及好多配套，要等時機成熟先可以推行。
工聯會議員王國興同民主黨議員張文光，即場自爆過往亦有過腰痛問題，仲齊聲指摘會議廳嘅舊座位設計係腰痛嘅起因，最後靠脊醫幫佢哋醫番好條腰，批評政府做法對脊醫好唔公道。其實議員有腰痛問題都係小事，最緊要係有腰骨，唔好成日轉軚欺騙選民就得喇！