政情：王桂壎沈祖堯任新公職
剛卸任香港律師會會長嘅王桂壎，早兩、三個星期前先獲委任為機場管理局成員及香港國際仲裁中心主席，尋日又多咗一項新公職，估計唔使好耐又會變成另一政府公職王。
入司法人員推薦委員會
阿壎今次係接替另一律師會前會長史密夫，出任司法人員推薦委員會委員，即係有份就法官嘅新任命同升遷提供意見，對法律界影響好大，對盛傳有意參選立法會功能界別議席嘅佢尤為重要。
同阿壎一齊進身推薦委員會嘅，仲有沙士英雄中文大學校長沈祖堯，接替夠鐘卸任嘅香港大學校長徐立之。沈祖堯相對較少出任政府公職，今次破例接受委任，更加凸顯呢個委員會有幾把炮。委員會另一新委員係做過醫務委員會委員嘅林李靜文，接替卸任嘅青年協會主席王䓪鳴，而前大律師公會主席袁國強則獲再度委任，四人嘅任命都係為期兩年。