政情：張宇人勞工界吵大鑊
最低工資立法實施咗一個多月，雖然未知影響有幾深有多遠，但已令立法會嘅勞工界議員同代表僱主階級嘅議員，為此結下不解之冤，雙方不時擦槍走火。政府近期提交嘅強積金修訂條例草案，喺尋日內務委員會上又掀起紛爭，自由黨張宇人（Tommy）建議開小組審議，但幾位勞工界議員就誓死反對，擔心小組阻礙修訂通過，雙方就此展開激烈駁火。
今次修訂強積金條例草案，其中一部分係因應整體薪酬上升而將僱員毋須供款嘅下限上調，即由月薪五千元增加至六千五百元，政府希望本月廿九日恢復二讀草案，以便今年十一月一日起實施。內會尋日討論應否成立小組審議呢條草案，Tommy話草案咁具爭議性，隨時有人反問點解下限唔係七千元或八千元，所以好應該按慣常做法，開個小組研究吓。
KK轟累打工仔多供款
工聯會黃國健（KK）聽到後有好大反彈，佢話六千五百元呢個下限，好多團體一早就贊成咗，況且呢個下限又同老闆們無關，開個小組去審盞拖累僱員無端端要供多幾個月錢，真係唔明啲僱主點解好似同僱員有仇咁？其實反對開小組嘅又點止KK一個吖，好似職工盟李卓人、民建聯陳鑑林及勞聯李鳳英等都表明反對開小組，認為早早通過草案，打工仔早啲受惠。
KK講嘢有骨落地，向來敢作敢為嘅Tommy又點會受得住吖，即刻好有火咁話佢無意要拖，但「有啲同事似乎人身攻擊，我同員工無仇嘅」，接住仲畀番說話KK聽：「如果議事堂冇爭議，出到去點知有冇爭議呀？呢個唔係有冇仇，唔係剝削員工，同事講嘢應該講得清楚啲，唔好混淆視聽！」現場火藥味愈來愈濃。
KK嘅黨友葉偉明見狀就幫口，話今次強積金下限已經討論過，工聯會只係唔想橫生節枝啫。經濟動力梁君彥亦加把口話，始終就咁靠舉手通過法例係好危險嘅事，既然有議員話咗要開小組審議吓，大家不如喺小組快快手睇吓條草案喎。雙方拗咗成半個鐘後，內會主席劉健儀見勢色唔對，拿拿聲叫大家快啲講完投票定輸贏，結果十二票贊成、六票反對，通過開小組審議草案。
其實今次Tommy嘅要求只係立法會慣常做法，本質上並無不可，只係一涉及勞資問題，勞工界難免特別上心，會覺得有人阻頭阻勢，睇嚟佢哋之間嘅深層次矛盾唔係咁易化解，好戲只會陸續有嚟。