政情：哥頓嘆做人不如海豚

樓市不斷升溫令市民「上車難」，復建居屋訴求此起彼落，可惜夕陽政府一直愛理不理。合和實業主席胡應湘（哥頓、圖）尋日出席一個政黨嘅工作坊時，講到土地利用問題就忍不住向政府發炮，話社會有聲音唔准填海，又有要求處理環保、保護白海豚等問題，又要成立部門保護樹木，佢就質疑政府係咪應該首先保護人先呢？尤其係保護年輕人，因為佢唔希望啲年輕人要捱二十至三十年，都冇自己間屋喎！

哥頓字裏行間簡直寸爆煲呔曾呢個夕陽政府，所以佢冇再寄望煲呔曾餘下任期做到啲乜嘢，反而呼籲下屆特首徹底檢討土地政策，唔單止復建居屋咁簡單，佢又以最近熱爆嘅僭建風暴為例，向政府教路可研究是否讓丁屋向高空或高密度發展。

為咗年輕人嘅福祉着想，哥頓最後甚至觸及自己嘅核心利益，苦口婆心希望下屆特首可以有魄力處理各項問題，唔係只係顧住養肥地產商，否則呢個社會想穩定都幾難。各位疑似特首候選人如果想攞到哥頓嘅票，就要聽清楚哥頓嘅金玉良言喇！

Money18免費即秒股票報價網站現推出8升級功能，財經資訊，實時實發！