國務院港澳辦主任王光亞旋風式訪港，港府高度戒備，就連一眾問責高官亦被批評不務正業，放低公事全職做導遊，可謂勞師動眾。管接管送之餘，多名局長更上山下海陪王光亞「香港一日遊」，搞到昨日連立法會嘅會議都唔開，搵班常任秘書長披甲上陣招呼議員，令問責制蕩然無存，仲畀議員批評班問責官員掛住做政治騷。
發展局局長林鄭月娥、民政事務局局長曾德成同運輸及房屋局局長鄭汝樺（Eva）尋日一早就陪王光亞出遊，去環球貿易廣場嘅觀景台欣賞維港景色。其後Eva仲陪王光亞遠赴天水圍參觀當區街市同公屋，同試吓嗰度嘅馳名蛋撻。不過，Eva就畀餅店員工踢爆佢早幾日已親自落嚟睇環境，兼夾買埋一打老婆餅返去試食。其實呢啲落區踩線小事留畀下屬做都得啦！
之後輪到民政事務總署署長陳甘美華同特首辦主任譚志源接力，陪王光亞閃電參觀沙田石門鄉議局新大樓；而政務司司長唐英年同公務員事務局局長俞宗怡，中午亦與王光亞同一班高級公務員共進午膳，最後唐唐仲送王光亞去信德中心坐船離開添！總之港府官員幾乎傾巢而出。班官員個個月薪二、三十萬元，走晒去陪一個正部級官員，唔係不務正業又係乜呢？