政情：團體轟賣政府山違規
由二十個環保同規劃團體組成嘅政府山關注組，踢爆商務及經濟發展局常任秘書長謝曼怡五年前做行政署長嗰陣時，為咗爭取喺添馬艦興建新政府總部，喺報章撰文話明白各界保育政府山建築群嘅訴求，又話有任何改動都會先諮詢公眾。言猶在耳，發展局去年宣布賣政府山起甲級商廈時，保育建議就隻字不提，關注組矛頭直指謝曼怡嘅老公、主力推銷賣山方案嘅發展局常秘周達明。
公共專業聯盟主席黎廣德批評政府違反誠信，冇兌現當年謝曼怡嘅承諾，新方案隻字不提保育建議，而且去年做嘅諮詢，至今仲未公開結果。黎廣德仲批評，周達明身為城規會主席，主持審議賣地研究報告嘅會議，會有角色衝突，認為有損公平，更懷疑有違城規會指引，已經透過城規會要求周達明避席，但獲回覆指官員出席會議不會影響其獨立性，而堅持由周達明主持會議。黎廣德話，會同律師研究指引，如果真係有違規，唔排除採取法律行動喎。