政情：立會新大樓難防掟嘢

立法會秘書處尋日首次帶傳媒參觀新大樓，逢周三開大會用嘅會議廳當然係焦點。秘書長吳文華（Pauline）話，會議廳入面，記者席同觀眾席分兩層，觀眾席一共可以容納一百三十四人，同議員座位之間有玻璃隔住，但係由於塊玻璃唔係密封，坐喺觀眾席嘅市民仍然可以掟嘢落去會議廳，所以Pauline話唔能夠擔保搬咗新大樓之後，會冇人掟嘢。

位於「立法會道一號」嘅新大樓，面積足足大過依家中環立法會四倍，達四萬平方呎，加上立法會外最多可以有四個示威區，所以立法會要大增保安人手，由現時三十人大增至九十人，迎戰日後嘅攻防戰。除咗保安多，導賞團都多，日後立法會每周會舉辦八十多個導賞團，供市民、學生、遊客參觀，所以秘書處會招聘十一名全職導賞員，介紹新大樓。