政情：林鄭「特赦」僭建耍舊戲法

發叔尋日接受電台電話訪問時重提前日同林鄭火併嘅成果，佢好坦白話無辦法滿足到所有新界人嘅要求，但依家都叫攞到啲嘢喺手，形容「依家攞唔到百分百，都叫有少少得到好處」，令到五成面積嘅天台屋成為合法比例。咪住，政府只不過係話暫緩執法而唔係特赦喎？發叔就笑笑口答話：「贏咗一段時間安樂，大家都會接受啦！」

發叔拉潘潔落水

發叔又不忘拉埋環境局副局長潘潔落水：「副局長都搭（僭建物）出嚟啦，佢都唔係原居民！」以示村屋僭建未必一定係原居民所為。

不過，有新界人就爆料話，政府部門以往都有既定嘅僭建物執法先後次序，唔超過五成面積嘅非密封天台屋唔使拆，呢個不成文規定好多新界人都知，所以好多村屋業主好似有晒默契咁只係起一半天台屋，唔攞到盡起足全層，仲話今次政府根本只係假讓步，一啲都唔覺得開心。

我哋曾經爆料，其實林鄭私底下早已答應鄉議局放生村屋嘅第四層，但礙於僭建風暴愈演愈烈，為勢所逼下先至推倒重來，加上港澳辦主任王光亞過去幾日訪港，當局擔心王光亞參觀鄉議局新大樓會節外生枝，惟有急急作出表面上讓步，將舊準則當新讓步，但又講明只係暫緩執行而唔係特赦合法化，等鄉議局有得向原居民交代之餘，政府亦可以保住顏面。

可能發叔深知林鄭「炒冷飯」，所以都唔敢攞彩攞到咁盡，聲言唔覺得前日同林鄭嘅商討係取得勝利，佢話：「民間唔會出現大動盪先算勝利！」警告政府小心官逼民反。

發叔仲留定後路，講明前日嘅協議唔係定案，仲要等鄉議局召開過千人大會商討，佢會盡力說服大家，但最終決定係點，就要睇吓有幾多人反對再見步行步喎。大家就睇吓班鄉紳有乜行動喇！