中環出更：東華社企進駐新政府總部
東華三院旗下嘅社企「愛烘焙麵包工房」（i-Bakery），愈來愈受城中名人追捧，最近仲打敗眾多唔同社企競爭者，勇奪添馬艦新政府總部大樓嘅新合約，待政府總部落成入伙後，將進駐開設一間經營輕食餐飲店。i-Bakery店舖愈開愈多，生意愈做愈旺，難怪一班為善最樂嘅董事局高層咁開心啦！
東華三院一眾董事局成員尋日齊齊現身喺尖沙咀The Mira酒店舉行嘅午宴，主席張佐華宣布咗呢個好消息。佢話到時新店舖將展示殘障人士嘅藝術作品，畀大家知道弱能人士都有令人意想不到嘅藝術天分。i-Bakery嘅出品甚受城中名人歡迎，尤其是曲奇餅，早已打出名號，連東華副主席何超蕸（Maisy）都係擁躉。
何超蕸讚曲奇出色
Maisy話畀卓妮聽，佢最鍾意食牛油曲奇及腰果曲奇，盛讚曲奇餅入口鬆化，牛油味又唔濃，至於熱辣辣嘅菠蘿包更加好食到不得了，佢仲經常買嚟開會時做茶點添！
今年係廣華醫院成立一百周年，喺廣華服務咗幾十年嘅廣華醫院副行政總監兼外科部主管葉維晉醫生，原來佢都係喺廣華出世，同廣華認真有緣。
葉醫生仲自爆當年喺廣華出世時，竟然係對腳出嚟先，呢個秘密連佢媽媽都唔知，直至十幾年前佢去參觀廣華圖書館，好奇心驅使翻查自己出生紀錄，至揭開呢個塵封咗幾十年嘅秘密，仲話件事證明廣華接生水準有幾高。葉醫生風趣幽默，逗得台下賓客笑爆肚皮。
卓妮