政情：大舊石提修訂冇人撐
近期愈來愈多人談論地產霸權，但本身代表地產及建造界嘅立法會議員石禮謙（大舊石），尋日就喺立法會上大呻自己無權無勢，即使有啲提議好有道理，都畀政府同其他議員斷然否決，非常無奈。
港府早前提議向短期易手嘅豪宅交易徵收額外印花稅，藉此壓抑炒風。立法會內務委員會尋日討論有關草案嘅三讀日期時，大舊石表明會提出修訂加入「日落條款」，即係訂明加稅措施喺實施一段指定時間後，就會自動失效，如果當局認為有需要繼續推行，必須重新要求立法會修例。
大舊石強調有關做法合情合理，可以避免將來樓市逆轉時，永遠慢幾拍嘅政府趕唔切取消加稅措施，令受到樓價下跌打擊嘅市民，想認輸離場都仲要畀額外印花稅懲罰。不過，議會內冇人肯撐佢，大舊石抱怨話：「我依家終於體會到『夠票就通過』係乜嘢一回事，我都係想畀番個權立法會啫，呢個權又唔係『地產霸權』！咁都唔得？」