政情：林D9搞僭建搞到去立會
政制及內地事務局局長林瑞麟（林D9）為咗禁止重演「五區公投」，硬銷替補機制方案，不惜快刀斬亂麻，諗住拍膊頭叫建制派幫忙，將替補機制草案夾落《二○一一年選舉法例（雜項修訂）條例草案》一併討論，以趕及暑假前通過。立法會內務委員會尋日就此展開激辯，面對泛民主派誓死反對，建制派竟然袖手旁觀，結果建議遭到否決，議員更批評林D9此舉等於喺立法會搞僭建。
泛民喪鬧 建制派冷待
民建聯主席譚耀宗尋日喺內會上先做爛頭蟀，以雜項修訂草案委員會主席之身份話，替補機制同雜項修訂有關，加上要趕及立法會休會前搞掂，建議不如一次過搞埋啦。此話一出，泛民主派群起攻之，日前因為替補機制而激動到衝擊林D9嘅人民力量黃毓民，鬧爆替補機制係重大憲制改革，有乜理由同雜項修訂擺埋一齊傾？搞到草草收場、霸王硬上弓，香港遲早有暴力政治，官逼民反呀！
職工盟李卓人亦加入罵戰，揶揄一併處理即係「立法會自己搞僭建」，真係離晒譜，如果咁都得，倒不如將替補機制加落殘疾人士歧視嘅草案內一併討論啦，橫掂替補機制係殘疾議案，「自己整衰自己，整衰議會」。民主黨張文光亦提醒政府咁樣走捷徑法，社會只會有更大衝突，真係要三思呀。
泛民火力全開，建制派方面就只得民建聯葉國謙勉強幫手還擊，但講到模棱兩可，佢話：「我又唔覺得有咩僭建喎！一併做無非想快啲搞掂，之不過都唔係一定要合併做嘅！」最後譚耀宗舉手投降，話既然議員唔想一併處理，立法會又有配額另起爐灶，咁就開多個委員會處理替補機制喎，忽然咁順攤，泛民中人都感到好愕然。
今次林D9落得如此下場，據聞係建制派中人都對一併處理嘅建議有怨言，話說林D9早就叫建制派冧友去雜項修訂草案委員會，以便處理一啲棘手嘅開支，但後來建制派發現，原來林D9一早就想將替補機制加埋落雜項修訂草案委員會一併處理，有被擺上枱兼被欺騙嘅感覺，所以就唔幫拖撐呢個合併建議。估唔到林D9喺屋企僭建衰咗，想喺立法會搞僭建又失敗，呢個故事教訓佢欲速則不達呀！