疑似特首候選人、政務司司長唐英年被揭發正在組織選舉工程，喺來自四方八面嘅傳聞之中，有一則幾發人深省，傳聞話唐唐原本想搵有「煲呔針」之稱嘅前立法會議員鄭經翰幫手搞選舉，有京官就認為煲呔針去年搞選舉方案嘅「起錨」騷，都搞到一鑊泡，於是向唐唐「好言相勸」，唐唐至籌謀另組選舉班子。
呢個傳聞真唔真，唔會有人企出嚟確定。不過，唐唐如果真係搵煲呔針助選，有乜好處得佢自己知，但缺點就多籮籮，煲呔針除咗去年搞「起錨」騷搞得差之外，有名你叫，佢係煲呔曾嘅人，同現屆政府嘅關係千絲萬縷，有更多機會畀對手抽秤，真係攞嚟煩，更加唔使講煲呔曾可能有特定諗法，要透過佢支針幫手執行。
有意要參選特首嘅人，當然要好有政治智慧，如果唐唐真係諗過搵煲呔針助選，佢嘅政治智慧就好令人質疑喇。選舉係做特首嘅第一步，籌劃選舉又係參選嘅第一步，唐唐今次喺第一步就畀人穿晒煲，真係落筆打三更，未攞分，就已經扣晒分。