特首競選網頁成為呢幾日嘅熱門話題，證明網頁已成為一個重要宣傳渠道。不過，我哋尋日打開自由黨個網頁，發現除咗首頁內容之外，其他多個欄目包括該黨自我介紹、「議事論事」、新聞發布、活動宣傳、就連「尋求協助」，進入頁面後都寫上「網頁內容建構中」，據聞係同該黨四月底有五位黨員退黨有關。
如果大家記得，自由黨有五位黨員喺四月底退黨自立門戶，並成立政黨「T Party」，其中一名黨員馮德聰（Paul）任職「資訊工房」資訊科技總監，未退黨前負責幫自由黨管理網頁運作，但佢退黨之後，大家分道揚鑣，據聞自由黨亦唔再選用阿Paul嗰間公司，要另覓新公司管理網頁，所以令該黨網頁未能正常使用。
有業界人士話，網頁轉換管理公司需要一段時間，加上自由黨網頁都存有唔少前黨員嘅資料及相片，如果要刪除十足幫燕窩揀毛，真係唔知幾時先至搞得掂，但論該黨嘅財力，肯使錢應該唔會太耐嘅。