政情：余鵬春慨嘆靚舖位無價
香港百物騰貴，尤其係租金上升速度快到嚇驚人。喺多個旺區都開門市嘅裕華國貨董事副總經理余鵬春，都大嘆舖租貴，原來佢哋唔係全部門市都係自置物業，所以一樣要承受業主加租之苦。余鵬春話，呢兩年租金以百分之二十、三十、四十係咁加上去，雖然生意盈利尚可支持租金，但打開門口做生意，邊個老闆可以保證年年有錢賺呢？
既然舖租年年係咁加，點解唔自置物業呢？余鵬春坦言，暢旺地段嘅靚舖位，全部都係有市無價，根本唔會有人肯放盤，即係想買都冇得買，加上同港元掛鈎嘅美元又貶值，喺通脹及港元貶值嘅雙重打擊下，對佢哋零售業都構成一定影響，最慘係唔能夠完全將成本轉嫁畀消費者，所以經營都幾困難。
不過，雖然搵食艱難，但善事都係要做嘅，余鵬春家鄉嘅嘉應學院，多年來就贊助好多大學生入讀，免首年學費，單是去年就有四百個學生受惠，好多人畢業後仲會加入呢個愛心行動，捐錢支持番其他師弟妹，令余鵬春大為感動。