政情：肥胡送郵票差啲食檸檬
今年係總商會成立一百五十周年大日子，尋日賣大包免費招待市民乘搭來往尖沙咀至中環嘅天星小輪，同時包起十五部電車，市民上啱車就一個仙都唔使畀，認真開心。總商會主席胡定旭（肥胡）、總裁方志偉及理事文路祝，仲出動到場大派紀念郵票，全日派出一千套，認真大手筆。
肥胡表現好親切，乘搭小輪時仲扶住一位婆婆落船。事後問返個婆婆，婆婆話唔知肥胡係乜水，只知道係大人物；期間亦有市民仲上前要求肥胡簽名同合照。雖然肥胡好受歡迎，但佢都差啲食檸檬，事關一位外籍女士以為佢哋兜售紀念品，一度拒絕接受郵票，肥胡於是用流利英語解釋，呢位女士先欣然接受咋。
除咗搭船外，肥胡仲有搭電車，佢聲稱平時經常由西環搭到去中環同金鐘食飯，貪佢方便唔使司機兜來兜去，如果大家搭開電車就記得留意吓喇，事關總商會主席隨時坐喺你旁邊㗎。
另外，天星小輪總經理梁德興話，由於通脹、高油價及最低工資實施，令經營小輪成本不斷上升，唔排除有機會申請加價喎。