政情：馮驊規管網台腳軟縮沙

尋日諮詢會有幾百人參加，還未開始時，台下嘅參加者已經先聲奪人，號角聲、哨子聲震耳欲聾，響個不停。參加者高舉「選舉假公平，網絡真打壓」、「馮驊至無腦」、「選管無賴」等示威牌，又叫在場官員少講廢話，批評諮詢會係偽民主，更有人話建議係將網絡廿三條斬件上馬。現場更有人扮演紫荊俠要求發言，令在場參加者即時起哄。

民主黨副主席劉慧卿都有到場，佢發言時話，規管網台只會令香港淪為國際笑話，無論技術同原則上都講唔通。不過，一直視卿姐為「民主叛徒」嘅人民力量支持者就多次阻撓卿姐發言，大叫「民主黨正走狗」，搞到卿姐黑面話：「依家發生咩事呀？唔通我淨係講你哋鍾意聽嘅嘢就叫民主呀？」

參加者起哄 保安護駕

社民連立法會議員梁國雄（長毛）都有出席，佢批評選管會嘅建議非常荒謬，擔心馮官（馮驊）受到政治壓力，搞到冇足夠智慧做正確嘅決定喎。佢又形容，馮官嘅行為係與民為敵，因為互聯網自由是民間最後一分力量，選管會嘅做法係逆時勢而行。長毛仲帶領在場人士高呼「唔應該做」、「互聯網萬歲」等口號，場面震撼，搞到台上嘅馮官聽到黑晒臉。

全場參加者聲嘶力竭，令馮驊變成箭靶，雖然台下有十幾個保安一字排開護駕，但咁嘅場面確係令人不寒而慄。馮驊起初話指引唔係要規管傳媒機構，只係規管網上媒體，但係隔咗唔到十五分鐘又改口，話網上電台同電視台嘅準則好難界定，執行上有好大困難喎，總之講到唔清唔楚，冇人聽得明佢講乜。

馮官前言不對後語，全個諮詢會只係反覆強調修訂選舉活動指引冇任何政治考慮，又話會認真考慮反對者嘅意見，睇吓指引可唔可以改好啲、甚至撤回建議喎。唉，早知今日，又何必當初呢！與其畀人鬧完一輪先肯改，點解唔一早做好啲？唔通因為夕陽政府太過無能，搞到啲法官都冇晒智慧？