中環出更：馬時亨教路做快樂老闆
港人生活富庶，但論快樂指數，卻排名東南亞最差。中策集團主席馬時亨尋日變身開心果，開壇傳授快樂秘笈。肥亨自爆「開心管理哲學」，當年開壽司店做老闆時，不時請員工食飯兼抽獎，結果壽司店勁賺六十倍利潤，回報勁過買樓多多聲。
肥亨交際手腕了得，政壇商界都吃得開，原來佢冧員工更叻。尋日佢以顧問身份出席喺理工大學舉行嘅「香港提升快樂指數基金」講座，開壇分享「如何做快樂老闆」，同台仲有前理大校長潘宗光。
潘宗光：懂得謙卑
肥亨話，當年做老闆時不時落舖做啦啦隊，一到員工大會，就揼班股東心口搞大抽獎，氹得員工好happy，洗碗拖地都落力過人，自然客似雲來。講起高官僭建醜聞不絕，港人睇見想happy都難，肥亨就話：「太複雜，係深層次矛盾。」佢自己間半山豪宅絕無僭建，歡迎大家去參觀喎。
潘宗光都教兩招畀大家。篤信佛理嘅佢，三句不離講佛偈。佢承認當年啱啱做校長時意氣風發；學佛後，懂得謙卑，以平常面對得失，即使月前驗身時發現胰臟有異，一度以為係腫瘤，佢亦處之泰然，後來證實虛驚一場。
講番「香港提升快樂指數基金」，會長陳國民、副主席施榮懷及前入境處助理處長陳詠梅（Helen）都現身撐場。Helen退休後擔任基金會義務總幹事，遲啲會帶二百位營養不良小朋友去食品展買健康食品，敍福樓集團執董黃傑龍聽見，拍心口請班小朋友去佢酒樓開餐，善心滿瀉。
卓妮