政情：立會談環評潘潔良心發現
特區政府輸咗港珠澳大橋環評官司後，煲呔曾只識賴地硬，批評有人借環保之名濫用司法程序阻撓基建，隨即被全城鬧爆佢干預司法獨立。可能政府知衰，近日好多高官評論呢單嘢時都立場軟化，好似署理環境局局長潘潔尋日就喺立法會上，強調市民有提出司法覆核嘅權利，完全係良心發現。
大輝倡朱婆婆做顧問
自從煲呔曾「干預」司法獨立後，建制派紛紛應聲附和，尋日輪到立法會「五散人」嘅林大輝畀隻靚牌政府上，佢質詢政府有冇收過市民不滿有人喺背後策動官司嘅投訴，仲問政府會唔會主動查吓係咪有人喺背後操控官司，仲話：「寧欺鄭汝樺、邱騰華，莫欺朱綺華（就大橋環評報告提出司法覆核嘅婆婆）」，話既然朱婆婆睇環評報告仲叻過高官，不如請佢做顧問啦。
潘潔回應時唔敢再話有人阻撓基建，只係話冇收過有關投訴，亦冇人要求政府跟進事件，強調香港有言論自由，司法獨立係社會基石，市民可以用司法覆核等不同嘅方式作出行動，政府會尊重呢啲行動喎，變相為當日煲呔曾嘅口臭言論補鑊。