中環出更：女童軍周身章 蔡太自愧不如
考章係女童軍生涯最大挑戰，城中名太都係過來人。身為女童軍名譽副會長暨香港副總監嘅蔡關穎琴自爆中學時喺女童軍考獲唔少章，可惜早前擔任優秀女童軍選舉評判時，亦差啲被考起。原來佢被「周身章」嘅年輕女童軍嚇呆。
得獎嘅優秀女童軍尋日齊出席頒獎禮，蔡太與新任香港總監彭徐美雲齊撐場。蔡太話，讀書時好羨慕「周身章」嘅女童軍，到自己考章時，卻並非百發百中。佢早前評審優秀女童軍，睇見參賽者個個掛滿一身章，部分章連自己都考唔到，禁不住搖頭嘆息:「應該由參賽者嚟評審我就真！」
彭太獨愛梘水糉
蔡太真係謙，今日端午節，佢孖住老公蔡冠深返中山大宅執屋，雖然好操勞，但就夠晒Sweet。蔡太話，蔡生祖籍中山，間屋早前改動間隔，啱啱完工，會將香港屋企部分傢俬擺設搬上去，點綴一番。
至於彭太，今日相約家人一齊睇龍舟賀端陽。彭太獨愛梘水糉，食到唔停得口。展開總監任務後，彭太馬不停蹄，嚟緊七月會飛去英國，出席世界女童軍大會。