煲呔曾嘅麥當勞道碧雲樓祖屋露台被揭發僭建玻璃窗後，佢一直死撐話僭建未必違規，但屋宇署尋日發表聲明，表示會向煲呔曾發出勸喻信，要求佢自行清拆上述僭建物，或者聘請認可人士證明有關僭建符合法例要求，而煲呔曾亦發聲明話會清拆有關僭建物。今次煲呔曾祖屋「不保」之餘，仲隨時累埋街坊，事關現場所見，同一大廈都有多個單位有類似僭建問題，睇怕都係難逃清拆命運，真係多得煲呔曾唔少。
身為特區政府首長都知法犯法，惹來各界連番批評，就連網民都惡搞一番。有網民話煲呔曾涉嫌僭建嘅祖屋位於「麥當勞道六十四號」，地址耐人尋味，點解？因為暗示緊「勿當奴、悼六四」喎，話可能係煲呔曾暗地向大家發出六四呼聲，仲話愈來愈相信煲呔曾係民主無間道。
其實煲呔曾都唔係第一次畀網民惡搞，去年佢宣傳政改，用咗好蹺口嘅「起錨」做口號，結果畀網民改咗做「超錯」，單睇字面設計有九成似，煲呔曾都不得不讚網民有創意。○九年煲呔曾喺立法會講咗句「我嘅意見就係代表香港人嘅整體意見」，旋即惹來泛民主派政黨及網民高呼「曾蔭權不代表我」，呢句口號仲畀政黨印埋喺T恤上發售添。