政情：鄉局三巨頭是非中連任
過去一年，新界鄉議局可謂風雨飄搖，領導層三位正、副主席先後受到醜聞困擾，好似主席劉皇發漏報物業買賣利益、副主席張學明又畀人踢爆僭建，而最多是非嘅林偉強就更加麻煩多多，仲差啲惹上官非添。雖然係咁，佢三位嘅地位喺鄉議局仍然好穩，尋日改選，三位都成功連任，不過佢哋似乎都唔可以開心住，因為未來四年有大堆棘手議題等緊佢哋，淨係理順村屋僭建個案就有排煩啦。
尋日除咗孱仔強外，發叔同學明都喺無對手下自動當選。孱仔強受到荃灣鄉委會主席鍾偉平挑戰，事前不時傳出佢選情告急、發叔首次唔肯出手幫佢拉票等，最終發現原來一切都係煙幕，孱仔強以九十九票比三十一票大比數勝出，再留心睇吓，三位新任正、副主席尋日其實着埋一式一樣嘅西裝同領帶，啊，原來孱仔強一早得到發叔祝福，唔怪得咁老定啦。
爭拆僭保育賠償
講番發叔，佢尋日當選後同在場傳媒講，四年前競選連任時曾經講過，今年唔會連任，只不過雖然佢積極搵人接任，可惜各位鄉紳仍然十分謙讓，加上近日突然爆發村屋僭建風暴，喺呢個極為嚴峻時刻決定當仁不讓連任主席，不過下屆一定要退休喎。聽發叔咁講，嚟緊四年似乎係佢在任三十幾年以來最嚴峻一屆任期喎。
發叔講到明，嚟緊兩大議題係處理僭建風暴、同埋新界土地被政府以自然保育為名凍結咗土地用途，就首次講到明政府應該向受影響鄉民提供合理賠償添。發叔嚟緊工作唔少，而且件件都係燙手山芋，鄉議局內部近年又多咗異見聲音，話佢哋內憂外患共冶一爐都不足為過。
成立小組搞「活化」
問題多，可惜幫到手嘅人少。副主席學明要分身幫民建聯搞地區工作，至於孱仔強，佢慵懶嘅態度早就出晒名，而佢處理鄉議局新大樓工程嘅表現就令唔少鄉紳有微言，嚟緊佢個副主席位到底係唔係可以安安樂樂、穩穩陣陣都未可知。
唉，孱仔強今次連任成功，對鄉議局而言到底是禍是福都係未知數，希望發叔今次真係冇選錯人啦。
講到底，嚟緊鄉議局除咗處理僭建風暴外，另一急切問題就係培養接班人，發叔尋日就話，嚟緊新一屆會盡快成立小組研究點樣去「活化」鄉議局喎。計我哋話，活化就太嚴重喇，加入多啲新血就真係必須嘅，否則下屆輪到孱仔強揸旗，鄉議局就真係想唔「活化」都唔得喇。