中環出更：李少光一桿入洞食飯慶祝
近期高官接連發生僭建醜聞，自稱「身家清白」嘅保安局局長李少光一於少理，繼續埋首高爾夫球運動。光哥繼三年內先後兩次一桿入洞（hole in one）而贏得「三年抱兩」美譽後，幾個月前佢喺中山打波再度一桿入洞，前晚就約齊成班政商界波友到北角海關大樓餐廳筵開六席慶祝，當晚仲籌得十萬元捐畀地中海貧血兒童基金，善心滿瀉。
出席光哥慶波宴嘅有全國政協常委陳永棋、全國政協盧文端及黃楚標、中策集團主席馬時亨及行政總裁柯清輝、嘉華集團主席呂志和、財經事務及庫務局局長陳家強、前稅務局局長劉麥懿明、立法會議員黃宜弘等六十多人，場面好熱鬧。一大班波友酒酣耳熱不在話下，現場仲舉行推桿比賽及「一擊即中」兩個遊戲環節，陳家強贏咗推桿比賽，將一支靚紅酒獎品捧回家。