中環出更：名人撐環保各師各法
環保問題愈嚟愈受到關注，尋日一眾城中名人齊集探討地球暖化，講起響應環保生活，個個都有自己一套。保良局主席龐盧淑燕表示，佢平時唔止少用膠袋，就連膠盒都好少用。咁仲未夠，其大宅奉行慳電政策，冇人嘅廳房一定要關燈，就算入書房睇書，都只係開着桌上枱燈。龐太咁做梗唔係為咗慳電費，佢為地球環保嘅一份心意。
勞永樂醫生就以雙腳代步，減少揸車響應環保。佢屋企同埋診所都喺半山，平時返工都行路搞掂，極少揸車，咁多年來樂此不疲。近期佢仲迷上玩爬山單車，咁就可以去得遠啲喇！
鍾建民嘆冰川消失
立法會議員梁家傑就話，動物放屁嘅氣體會破壞臭氧層，所以佢奉行少肉、多菜嘅飲食習慣。咁樣既幫到環保，又令自己身體健康啲，確係值得推廣。佢又教人洗頭時唔好長開花灑，先用些少水整濕個頭，然後閂咗花灑慢慢抓頭，最後再開水沖乾淨頭髮，慳到好多水。
攀山專家鍾建民都喺度，佢話近年重返廿幾年前造訪嘅冰山，發現好多都消失咗，為咗下一代，大家要為環保付出實際行動至得。