政情：立會保安顧問「守」儲物房
我哋曾經講過，立法會秘書處原本聘請咗一位退休警司出任保安總管負責舊立法會大樓嘅保安工作，以及籌備嚟緊搬入添馬艦新立法會大樓後嘅保安安排，但唔知係因為工作壓力大、待遇欠佳或另有高就，做咗唔夠三個月就劈炮唔撈。秘書處早前終於請番另一位退休警司擔任兼職保安顧問，但由於舊大樓嘅辦公地方早已逼爆，呢位保安顧問最後被迫要喺議員儲物房裏面嘅一間細房辦公。待遇咁差，會唔會好快又唔撈㗎？
立會最快喺今年暑假先至搬去新大樓，但由於要預先做好培訓嘅工作，秘書處各個部門一早已經開始陸續請人，部分更已經返緊工，令原先已好唔夠地方用嘅舊大樓辦公室進一步逼爆。立會行政管理委員會早前就決定，將本來供議員借用嘅003B號房，暫時編配畀秘書處職員使用，直至另行通告為止。
003B房位於舊大樓地下，面積可能連一百呎都唔夠，仲要經過班議員嘅儲物櫃同休息室先入到去。喺呢度返工不但與其他秘書處同事隔絕，仲難免經常同班議員老闆撞口撞面。到底邊位秘書處職員咁唔好彩，被安排喺呢間房裏面辦公呢？原來就係新請返嚟嘅兼職保安顧問戴宏（Kenneth Davey）。
警察出身 兼職受聘
翻查資料，戴宏同之前中途劈炮嘅保安總管都係警察出身，做過海傍警區指揮官及署理警務處助理處長（服務質素監察部），應該有豐富嘅處理示威衝突及保安管理經驗，啱晒做立法會呢份工。但由於佢以兼職性質受聘，一個星期只返兩、三日工，加上「新嚟新豬肉」，最後被安排坐喺003B房。堂堂立會保安顧問變咗守儲物房，都咪話唔失威！
此外，秘書處日前又徵用咗位於舊大樓二樓嘅議員宴會廳，以便同班新職員舉行導向會，宴會廳內嘅咖啡角被迫暫停服務，令議員少咗個蛇王歎咖啡嘅機會。希望新大樓真係可以如期完工交吉啦，否則班職員同議員都會逼得好慘，唔通要秘書處喺舊大樓非法僭建以增加辦公地方咩！