中環出更：莫樹錦破例束縛自己
有「潮醫」之稱嘅中大醫學院臨床腫瘤科教授莫樹錦，衣着媲美男模特兒，造型百變，唯一着衫規條，係唔鍾意打呔。不過，卓妮周三喺快活谷馬場遇到佢，竟然罕有地打條金黃色領呔，但打得鬆鬆哋，冇箍到條頸實一實。執得咁正，並非佳人有約，而係馬會大董葉澍堃（Stephen）請食飯至真。
赴葉澍堃飯局
莫醫生話，已經十幾年冇打過領呔，但Stephen請客，點都要Formal啲嘅！打呔係成功男士象徵，何解咁抗拒呢？原來莫醫生份人怕束縛，又自覺打呔唔好睇喎，但佢肯為Stephen破例打呔束縛自己都算係大犧牲囉。講真，莫醫生有咁多女性Fans，相信都係同佢嘅有型Casual衣着有關。
