勁呀！正呀！香港都有真人版超級英雄！如果功夫茶一個唔覺意冇錢開飯，肯定會向呢一個超級英雄攔途請願，唔係叫佢施捨個發財錢，而係求佢嗖一聲飛入財政司司長官邸打怪獸！
到底發生乜嘢事呢？係咁嘅，香港出現一位全副武裝親自派錢嘅紫荊俠，向窮苦大眾伸出援手雪中送炭。呢一位女俠穿上黑色皮衣，着上黑色皮靴，戴上黑色口罩，唯一唔係黑色嘅係紫色眼罩，造型十足十就係打遍天下無敵手嘅漫畫人物，而且低胸裝扮非常性感。派錢受惠者包括九龍區籠屋居民，有現金又有糧食。
當然啦，超級英雄多數都會隱藏身份，唔會輕易話你知佢到底係何方神聖，所以蒙面女超人只肯透露佢係月入大約四萬元嘅中產人士。
至於點解要出手派錢，主要係兩大原因。首先，美國荷里活電影《勁揪俠》掀起一股凡人變超人熱潮，先後出現過鳳凰俠呀、荊棘俠呀以及綠魔俠等等，成個熱潮叫做「超級英雄計劃」，參加者盛裝出場儆惡鋤奸，或者救助老弱貧危。紫荊俠受到啟發，依樣畫葫蘆搖身一變派錢去也。至於點解取名紫荊？洋紫荊係香港市花吖嘛。
其次咯喎，啟發紫荊俠嘅仲有財政司司長曾俊華，古道熱腸嘅女俠係咁講嘅：「既然政府亂派錢，不如等我修正，我將擇日出動，先派我的六千元！」
嗱嗱嗱，呢家嘢就叫做仗義每多屠狗輩，雖然斷估紫荊俠嘅正職一定唔係賣狗肉，不過佢嘅行俠仗義絕對係民間傳奇。紫荊俠嘅出現再一次證明，鬍鬚曾嘅派錢方案係幾咁不得人心，連食飽無憂米嘅億萬富豪都話人人有六千元落袋，稍有俠義精神都覺得你亂七八糟啦！
紫荊俠仲話喎，為免令人懷疑係呃神騙鬼博出位，陌生人嘅捐錢係唔會要嘅，只會向相熟朋友「劫富濟貧」，要求佢哋將自己應得嘅六千元攞出嚟一齊扶貧。
講到呢度，功夫茶覺得好好玩又眼濕濕。真人版超級英雄打救窮人固然充滿幽默成分，之但係同時反映呢一個特區政府確係冇鬼用，連派錢都派到一塌糊塗，必須勞煩濟世為懷嘅女俠士撥亂反正，簡直令人感到既悲哀又可恥。
所以話啫，功夫茶真係希望紫荊俠出手教訓一下曾俊華。打怪獸嘅意思唔一定係打到佢一仆一碌，兜口兜面直斥其非都好吖，等佢撫心自問顏面何存。
功夫茶仲有一個希望，全香港所有富裕一族都將自己嘅六千銀攞出嚟打救窮人，或者索性好似紫荊俠咁樣粉墨登場親自去籠屋派錢，你話呢個世界將會幾咁美好！