港府早前喺社交網站開設facebook專頁「上亞厘畢道」，冀藉此機會宣傳下政府政策及做下政治騷。可惜由於港府施政搞到天怒人怨，曾班子民望又低處未算低，搞到每當佢哋上載新資料到facebook時，唔係畀人鬧爆，就係畀人惡搞，好似佢哋日前喺專頁上宣傳勞工處嘅「最低工資參考計算機」，又再次難逃網民圍剿。
勞工處日前推出「最低工資參考計算機」，畀市民喺網上填寫資料，從而計算自己嘅薪酬合唔合乎法例要求。港府官員即時將呢項「傑作」上載至facebook，期望博得掌聲，可惜卻事與願違。唔少網友都炮轟要輸入嘅資料太多，喺度浪費市民時間；亦有人指攞緊最低工資嘅市民大部分都唔識上網，質疑港府多此一舉。
不過，最多人鬧爆嘅卻非部計算機，而係港府本身。大家一人一句，狠批港府施政失誤，搞到民不聊生，整咩計算機都冇用。其實港府係咪應該自我檢討一下，何解本來可以搶分搶民望嘅嘢，最後都會淪為畀人鬧爆嘅境地呢？