政情：煲呔泛民鬧交似足肥皂劇

煲呔曾喺答問大會一句叫人深思點起火頭，事後知道自己口舌招尤，又砌辭推搪只係引述人哋意見，唔代表佢認同。民主黨主席何俊仁尋日以牙還牙，駁斥煲呔曾：「又唔見佢引述我嘅說話、長毛嘅意見？」鐵頭仁形容呢次事態嚴重，事關司法覆核要法官批准，所以煲呔曾嘅言論非常不君子，直接效果係攻擊公民黨，間接效果就係攻擊法庭，絕對唔能夠接受。

環團搞聲討會 追擊煲呔曾

職工盟立法會議員李卓人封咗三個「可恥」畀煲呔曾，包括踐踏法治、鬼祟、賊喊捉賊。公民起動何秀蘭更加唔排除提出譴責動議；而公民黨黨魁梁家傑就好簡單，叫煲呔曾向法庭同市民道歉了事，總之一人一句，誓死相隨。

正喺泛民鬧得興高采烈之際，稱得上帶起司法覆核之風嘅保護海港協會顧問兼前主席徐嘉慎就加入戰團，尋日佢舉行咗個「諉過於民、踐踏民權」聲討會，公開呼籲煲呔曾尊重吓自己嘅身份同地位，絕不能輸咗官司就去批評法庭判決，佢建議煲呔曾一係出來澄清糾正，一係就收番言論，唔好搞到特區政府好似大晒咁，總之煲呔曾應該尊重市民司法覆核權利、尊重法治。

識得息事寧人嘅就唔係煲呔曾啦，畀泛民同徐嘉慎咁樣鬧完，死要面嘅佢索性叫下屬喺下午五點幾鐘發出聲明，除咗老調重彈外，臨尾點都要攞番個彩，話對於有議員刻意曲解佢嘅言論深表遺憾。李卓人知悉份聲明內容後再封第四個可恥畀煲呔曾，就係顛倒是非。

事到如今，泛民同煲呔曾嘅互罵已經變成肥皂劇，雙方你一言、我一語鬧來鬧去，口水多過浪花，唔知噴到幾時先至完，究竟佢哋有冇諗過市民嘅感受呢？