生兒育女本來係人生一大喜事，可惜喺今時今日嘅香港就變得係一件極之煩惱嘅事情。生仔梗係要去醫院㗎啦，冇理由學似粵語殘片咁兒戲求其搵個接生婆返屋企煲定滾水就搞掂，問題係香港嘅醫院婦產科床位爭崩頭，醫管局轄下醫生護士又人手短缺，生兒育女搞到好似盲搶鹽咁神經緊張。
人手短缺成點呢？上年度整體公立醫院護士流失率高達百分之五點三，創咗近五年新高。重災區係產科同兒科，護士流失率分別係百分之八點二以及百分之九點六，助產士流失率更加係嚇到你毛髮直豎嘅七成三！
至於醫生咯喎，醫管局去年共有二十一名婦產科專科醫生離職，流失率高達一成。醫護人手已經短缺，再加上內地孕婦來港產子潮，直接影響本地孕婦權益。假設你係港女，眼見公立同私家醫院都被內地孕婦逼爆玻璃，你會唔會有勇氣懷胎十月等生仔呢？唔好以為有錢就可以幫襯私家醫院呀，事關公立醫院一話截龍拒收，家陣腰纏萬貫大把錢嘅國內同胞即刻轉投私家醫院。若然功夫茶係港女，真係唔夠膽生仔呀，一個唔覺意撲唔到產科床位，唔通真係學似粵語殘片咁兒戲求其搵個接生婆返屋企煲定滾水咩！
眼見問題愈來愈惡化，醫管局諗咗一條計仔。乜嘢計仔咁巴閉呀？各位觀眾，醫管局招聘婦產科兼職醫生！
醫管局今年一月率先於婦產科試行全新兼職計劃，由以往各醫院聯網自行聘用兼職醫生，改為以統一薪酬、職級以及工作安排嚟招聘。之但係可惜吖，反應非常之咁冷淡，至今只有九個醫生表示「初步有興趣」。
醫管局婦產科中央統籌委員會主席張德康坦言，兼職醫生每次上班只賺二千至三千元，對於喺私家市場「搵真銀」嘅醫生全無吸引力。即使退休醫生願意重返公院，但主要負責門診，毋須輪夜當值，肯捱義氣都作用不大。
唉，呢家嘢係食衞局局長周一嶽典型嘅辦事作風，莫講話臨渴先至掘井，而且掘嘅仲要係冇水嘅乾井。大佬呀，家陣私院婦產科醫生唔係叫做「星球人」就係「月球人」，意思係一星期賺一球或者一個月賺一球，月薪甚至周薪一百萬呀，點會稀罕你區區幾千銀？向私院埋手招聘兼職醫生喎，絕對係傻瓜先至諗得出嘅笨計。
有孕婦講過，爭唔到產科床位，寧願流產。計功夫茶話齋，不如做一次另類流產手術，問題或者迎刃而解。意思係話，將辦事能力低到冇朋友嘅周一嶽當作畸形怪胎，一嘢流產，阿彌陀佛！