接連有問責官員因病倒下，唔少議員都促請港府檢討公布機制。不過，尋日立法會政制事務委員會討論有關事宜時，社民連「長毛」梁國雄就好慨嘆咁話，叫高官披露佢哋嘅健康狀況都冇用，事關佢哋滿口謊言。
長毛尋日喺會議上細數過去高官嘅真假病歷，仲擺兩任特首上枱。佢話董建華當年係假腳痛下台，如今曾蔭權畀人衝擊後，又要人「提醒」先施施然去「驗傷」；而前任商務及經濟發展局局長、患有腦血管瘤嘅馬時亨，辭職後冇耐就返新工，同時欠公眾一個交代。
劉吳惠蘭早前因患癌辭去商務局局長一職，長毛尋日口快快咁話佢情況急轉直下，「好快就瓜」，喺委員會主席譚耀宗警告下，佢即時補鑊話只係指對方嘅官運玩完，算佢兜得快。長毛尋日竟點名讚佢嘅「冤家」政制及內地事務局局長林瑞麟，話佢通完波仔瞓喺床上都接受記者訪問，係「政治典範」，但亦不忘寸佢高調公布病情係基於政治原因。
