政情：梁松泰考牌揸政府車
唔少男士都好享受駕駛嘅樂趣，原來署理廣播處長梁松泰（Gordon）都好鍾意揸車，鍾意到點呢？專登考咗個政府車牌揸政府車，唔使政府車司機服侍佢，佢話咁樣做係唔想同事辛苦喎。
Gordon尋日現身電台活動，問起佢點解搶咗部AM車嚟揸，佢話自己嘅政府車車牌考咗已經四、五年，仲講笑話有朝一日如果無得撈，轉行揸政府車搵食都仲得喎。實情Gordon係唔想司機同事辛苦，所以平時往返屋企嗰程都自駕算數，不過對Gordon嚟講，揸住架政府車周街走唔係好享受，因為佢好擔心揩親架車，搞到要賠錢就唔好啦。
Gordon嘅座駕係政府編配畀廣播處長，問到佢幾時會有正印處長上任，Gordon即時大耍太極，表示相信政府有結果嘅時候自然會公布。同場嘅署理商務及經濟發展局局長蘇錦樑尋日一入場就差啲跣親，對於幾時有正印局長返工，佢索性三緘其口、乜都唔講。